12:01 PM لطيفة : فقدت صوتي في يناير وفبراير | |
كتبَ / احمد عباس اكدت لطيفة في برنامج "نص الحقيقة" مع الاعلامية لميس الحديدي علي قناة CBC انها ماكنتش ساكتة وقت ما حصلت الثورة التونسية وانها اتكلمت بس في قنوات تليفزيون بلدها في وقتها وقالت " كان لازم اتكلم لاني عمري ما فقدت صوتي زي ما حصل في شهر يناير وفبراير مابقتش لطيفة اللي بتغني تقريبا كنت عيانة في السرير فانا من ليلة رأس السنة كنت في مهرجان غنائي ولما اتساءلت عن تونس المظاهرات واللي بيحصل انا عيطت وانهارت لاني خوفت علي بلدي خوفت من المصير لكن بعد كده لما حصلت الثورة فرحت وصرخت وقلقت وخوفت ..كل الاحاسيس دي حصلت فيا ومبقتش افكر حتي لو حاغني حاقول ايه ... لدرجة اني كنت عايزة اسافر وكل ما اتصل بالراجل مدير خطوط الطيران التونسية عشان احجر يقولي مفيش طيران او المطار مقفول لاني كنت وقتها في مصر يا لطيفة خليكي في بيتك لما الدنيا تتظبط حاكلمك فمرضت بسبب الموضوع ده ". وضافت " السرعة فاجاتني اللي حصلت بيها الثورة لانه كان فيه قمع كتير وظلم كتير علي الرغم من انه كان فيه تطورات كتيرة كنت بافخر بيها وكنت في اعيادنا الوطنية لما باغني كنت باذكرها انه مثلا بلدان صغيرة تبقي ولاية او ان عدد الجامعات يكتر بس مع كل ده كان فيه حزن وغبن في عيون ولاد بلدي وكنت باحزن ان الشارع اللي كان فيه قهوة واحدة بقي فيه 10 قهاوي وكلهم طلبة معاهم شهادات عليا وماجيستير ودكتوراه " . ونفت لطيفة انه يكون لها علاقة بالقصر الجمهوري وبمرات الرئيس المخلوع واكدت انها بقالها 25 سنة عايشة في مصر درست فيها وبدات فيها وعملت الريبرتوار الفني بتاعها فيها لانها احتضنتها زي ماقالت اما تونس فبتروح مرتين الاولي في مهرجان قرطاج والمرة التانية في الاحتفالات الوطنية واكدت انه اخدت مرتين وسام الاستحقاق وقالت " انا عمري ما عملت حفلة وحضرها الرئيس يعني مش زي مصر لما كنا بنعمل احتفالات اكتوبر كان الرئيس بيكون موجود وكل قيادات البلد ". وقالت كمان انه مكانش في تونس حاجة اسمها قوايم سوداء ولكن كان فيه حاجة كده زي ان دي قايمة بيناشدوا الرئيس انه يجدد ولايته وطبعا ده حاجة مش صح وانها رفعت قضية علي الناس المسئولين عن القايمة دي وخليت نقابة الموسيقيين التونسيين ترفع قضية وقالت " انا عمري ما انتخبت وهما حطوا اسامي لناس معروفين بمثلوا تونس بره ولقيت ان 2 مليون في القوايم دي ميتين وانا معنديش اصلا بطاقة انتخابية فانا عايشة طول حياتي في مصر ". واكدت لطيفة "انا معاك قلبا وقالبا لمدينة العلوم والتكنولوجيا فمن 5 سنين استت جمعية خيرية بتاعتي وحاولتي من خلال مجهود فردي ومن خلال لطيفة اون لاين بتوعي اننا نبني مدارس لاننا معندناش لا نووي ولا اسلحة دمار شامل ولاغيره فالجهل والامية هو ده الدمار الشامل في حياتنا ". | |
|
مجموع المقالات: 0 | |